گونتای جاوانشیر

 

ندن ائلچیبه ی سؤیله می ساختالاشدیریلیر؟

 

هر کسه معلومدور کی، اردَملی اینسان وفات ائتدیکدن سونرا اونون شخصییتیندن بعضی اینسانلار اؤز چیخارلاری و یا اویدورما "تئوریلری!" اوچون بیر جور فایدالانماغا چالیشارلار. شرقین اسکی خوصوصییاتیدیر. بو دا ایستر-ایستمز بیر اولوسون تاریخی و دوغرولاری ایله آلای ائتمک، اولوسال دَیرلری مسخره ائتمک آنلامینا گلمکده دیر. بو ندنله زامانلا یالانلار گئرچکلری اؤرت- باسدیر ائدر، میللت ده اؤز دوغروسونون نه اولدوغونو تاپا بیلمز دوروما گلیر. صفوییتین 500 ایلدیر ائتدیگی ساختاکارلیق کیمی.

آذربایجان تاریخینده ائلچی به ی ده چوخ اؤنملی و آذربایجان تاریخینی ائتکیله ییجی شخصییتلردن بیریسیدیر. عملی سیاستینده باشاریلی اولماسا دا، ایده آلیست بیر وطنسئور کیمی تاریخه کئچمیشدیر. اونون بعضی گؤروشلری و سؤیله دیکلری آذربایجان تاریخینه و خوصوصن گونئی آذربایجان قورتولوشونا ایشیق توتا بیله جک ایچریکده دیر. باخمایاراق کی ائلچیبه ی ده شیمالی آذربایجاندا یایغین و سالغین اولان زردوشت "بؤیوکلویونون" تاثیریندن "بوتؤو آذربایجان یولوندا" آدلی کیتابیندا کناردا قالمامیشدیر. بو گون منبع شناسلیق علمی عمومییتله تاریخده زردوشتون اولوب اولماماسینی سوروشدورماقدادیر. تاریخده زردوشت آدلی بیریسینین اولماسی ایله هئچ بیر علمی قایناغا راستلانیلمامیشدیر. حاقلی اولاراق ناصیر پورپیرار سوآل ائدیر: ندن او دؤنَمه عاید ان کیچیک اینانجین به لیرتیلری مختلیف معبدگاهلاردا حک اولونموشکن زردوشتله باغلی هئچ بیر معبدگاهدا بیر داش یازیسینا راستلانیلمامیشدیر؟

یالنیز ائلچی به یین اؤرنک تولئرانسلی داورانیشلارینا گئرچکدن احتییاج وار. چونکو ائلچی به یین تولئرانسلی داورانیشلاریندان ائتکیلندیکجه، جوغرافییامیزدان، کولتوروموزدن و دینیمیزدن قایناقلانان شیددت، فیتنه[1][1] و خااوس اخلاقینا بلکه غالیب گلمک اولار. قناعتیمجه نه ائلچیبه ی، نه پیشه وری، نه ده رسولزاده گونئی آذربایجان اوچون اؤرنک تشکیل ائده بیلمزلر. سبب نه اولورسا اولسون مغلوب تاریخین و مغلوب لیدرین اؤرنک اولوشدورماسی تهلوکه لیدیر. اونلار بیزیم تاریخیمیزین بؤیوکلری. تام چؤکوش و محو اولما سورَجینی یاشایان گونئی آذربایجان اوچون 1-قطعیتی، 2- حربی تجروبه نی و 3- مدرن اولوسچولوغو اؤز شخصییتینده بیرلشدیرَن آتاتورک کیمی لیدر لازیمدیر. حاق غالیبیندیر و تاریخی مغلوبلار دئییل، غالیبلر یارادیب صاحیب چیخیرلار.

آنجاق ائلچیبه ی وفات ائتدیکدن سونرا اونون سؤیله دیکلرینی ساختالاشدیرما مئیللری اورتایا چیخمیشدیر. حیات فانیدیر. هر کس بیلدیگینی و شاهیدی اولدوغو گئرچکلری اعتیراف ائتمه لیدیر کی، آذربایجان تاریخی ساختاکارلیقلاردان آرینمیش اولسون.

ائلچی به یین "دؤولتلشمه، میللتلشمه، بوتؤولشمه" فورمولو بو گونکو گونئی آذربایجان میللی حرکتی اوچون موطلق بیر قورتولوش یولو دئییلدیر، آنجاق بیر ماراقلی باخیش آچیسی اولاراق دیققتی جلب ائتمکده دیر. ندن موطلق قورتولوش یولو دئییلدیر؟ چونکو هر نؤوع موطلقیلیک دوشونجه پلورالیزمینه قارشیدیر. دوشونجه پلورالیزمی اولمایان یئرده آزادلیق و دئموکراسی ده یوخدور، دئمکدیر. دوشونجه پلورالیزمی نین اولمادیغی یئرده، حتّی بللی بیر ویزیونو دا قاوراماق مومکون اولمور. نئجه کی، 1400 ایلدیر دینی پلورالیزمه یاساق گتیرن رسمی ایسلام آنلاییشی هر نؤوع ترققییه انگل تؤرتمکده دیر. گونئی آذربایجاندا دؤولت یاراندیقدان سونرا اؤز شرطلرینه گؤره دئموکراتیکلشمه نتیجه سینده میللتلشمه پروسئسی اورتایا چیخا بیلر. یعنی گونئیده کی سوسیولوژیک و ائکونومیک پلانداکی میللتلشمه، گونئیین اؤز شرطلرینه گؤره شکیللنمه لیدیر، بونو باشقا جور یوزماغا چالیشماق، نه بیلیم بیز دوشونجه ده بیر اولمالییق کیمی شابلون سؤزلرله گونئیه آنجاق ضرر وئریلیر. هر نؤوع اوتوپیک حرکت و اؤنگؤرو بؤیوک تخریباتلارا یول آچا بیلر. بو ایکی سورج ده ایستر-ایسته مز سون آماج کیمی بلیرلنن بوتؤولشمه یه خیدمت ائده جکدیر. گونئی آذربایجان قورتولدوقدان سونرا بوتؤولشمه نی بیزیم ایراده میزدن داها چوخ غرب مدنییتی ساغلایاجاقدیر. چونکو بیزیم بو ایستسقامتده هئچ بیر تجروبه میز یوخدور. تاریخیمیز بیزی بیرلیگه دئییل، بؤلونمه یه زورلاییر. بیرلیک مسئله سی مدرن بیر قاورامدیر و غرب مدرنیزمینین محصولودور. ذاتا بو گونون یارادیچیسی تاریخ اولدوغو اوچون بئله نتیجه چیخارماق اولار کی، موحافیظه کار مورتجع میللیتچیلرین غرور دویدوقلاری تاریخ بو گونکو دورومو یاراتمیش و بیزی فارسا تسلیم ائتمیشدیر. غرب مدنییتی نین بو باغلامدا آلمانیا بیرلیگی و آوروپا بیرلیگی کیمی تجروبه سی وار. غرب مرکزلی مودئرنیته، میللتلرین یوکسه لیشی اوچون هر نؤوع معنوی و اخلاقی دسته یی وئرمکده دیر. یئتر کی، یوکسلمک ایسته ین میللتلر غربین وئردیگی بو معنوی مساژی آنلامیش اولسونلار. غرب مدنییتی نین تورک میللتینه قازاندیردیغی چوخ اؤنملی معنوی حادیثه لر اولموشدور. بیزیم دیلیمیزین آبیدوی اثری اولان "کیتابی دده قورقود"و غرب مدنییتی قورویوب ساخلامیشدیر. غربه چاتمایان کیتابلاریمیز تاریخدن سیلینمیشدیر. گؤیتورک آبیده لرینی ده غرب علمی کشف ائتمیش، اوخوموش، کیتابلاشدیریب بیزه وئرمیشدیر. غرب دَیَرلری "میللت" مفهومونو کشف ائتمیش و گلیشدیرمیشدیر. بو باخیمدان دا ایرتیجاعنی باغریندا باریندیران موحافیظه کار "میللییتچیلییه" (!) قارشی گونئی آذربایجان میللی حرکتی بوتونو ایله لیبئرال غرب دَیَرلرینه اوز توتمالیدیر. بو گون ایرانداکی غرب دوشمنچیلیگینین اساس سببی اودور کی، غرب مدرنیزمی بوتون میللتلره سیاسی حاق تانیماقدادیر. ایسلام فاشیزمی غربی اؤیرَنمه ییمیزه مانع اولماقدادیر. غرب مدنییتی ایله باغلی آذربایجاندا اوچ نؤوع توتوم مؤوجود اولموشدور: بیرینجی آخیم حساب ائدیردی کی، غرب مدنییتی اینسانلیغین اورتاق ذکاسی نین اورونودور و حقیقتی کشف ائتدیگی اوچون اونون قارشیسیندا تسلیم اولماق لازیمدیر. حقیقتی درک ائدیب، سونرا اؤنونده تسلیم اولماق گرَکیر. بو آخیمین فیکیر رهبری کیمی م. ف. آخوندوفو گؤسترمک اولار. ایکینجی آخیم حساب ائدیردی کی، غرب مدنییتینی اؤز دَیَرلریمیزدن یولا چیخاراق اؤزومسه مک گرَکیر. بو آخیمین دا ان پارلاق نوماینده سی احمدبه ی آقااوغلودور. آنجاق احمد آقااوغلو بیر ائورنسَل میللی دَیَر نمونه کیمی گؤستره بیلمیر. اوچونجو آخیم ایسه حساب ائدیردی کی، غربله و اونون مودئرن دَیَرلری ایله ساواشماق لازیمدیر. بو آخیم داها چوخ دینچی، چاغیمیزدا ایسه مورتجع میللییتچیلر اولاراق بیلینمکده دیر. بو آخیمین ان پارلاق نوماینده سی ایسلام بیرلیگیندن یانا اولان سید جمال الدین(افغانی) اسدابادی ایدی. گونوموز گونئی آذربایجان میللی حرکتی نین منطیقیندن باخدیغیمیزدا بیزیم بیرینجی و آلتئرناتیوسیز موتتفیقیمیز غرب مدنییتی، غرب سئکولاریزمی، غرب مودئرن دَیَرلریدیر. بیزی اؤز تاریخیمیزدن قوپارا بیله جک آنجاق غرب مدنییتیدیر. هر بیر قوپوشون بیر قورتولوش اولدوغونو، بیر یئنی دوشونجه نین اورتایا چیخیشینا زمین یاراتدیغینی نظره آلدیغیمیزدا و هر نؤوع تاریخه حئیرانلیغین بیر فلاکت اولدوغونو گؤز اؤنونده بولوندوردوغوموزدا بیزی کئچمیشدن قوپارا بیله جک یالنیز غرب مدنییتیدیر. کئچمیشیمیزده نمونه اولاراق بیر تک قورتولوش و میللیلیک اؤرنگی یوخدور. بیزی فارسا تسلیم ائدن رسولزاده نین ده دئدیگی کیمی اؤز جینسیمیزدن اولان یؤنَتیملر اولموشدور. بو کئچمیشله، دوشونجه زمینینده ساواشمادان، حسابلاشمادان هئچ بیر قورتولوش مومکون اولمایاجاقدیر. هر دفعه چالادان چیخیب قویویا دوشه جه ییک. ملی عاقلیمیزی سیزیلداماغا، زیریلداماغا، آغلاشمایا تسلسم ائتمیش شاه ایسماعیلچیلیقلا و عمومییتله صفویلیکله حسابلاشمانین زامانی گامیشدیر.

ائلچی به یین "دؤولتلشمه، میللتلشمه، بوتؤولشمه" اؤنریسی موطلق و دینی آیه لر کیمی بیر سجییه داشیماماقدادیر. یعنی ائله دئییل کی، مثلن، بئله اولمازسا اولماز. بو کیمی کؤکدَنجی، فوندامئنتال یاناشما یالنیز ضرر وئرمیشدیر اینسانلیغا. اولوسال پارادیقمانین اولوشوموندا اولولارین اؤنگؤرولری هر زامان لازیم اولور، آنجاق ژ.پ. سارترین دا سؤیله دیگی کیمی، ائتکین و آکتیو ائنئرژی جامعه نین ایچینده کی دیالئکتیک سورجده و سییالییتده دیر. ائلچی به یین اؤنریلری ده قورتولوشون آشامالاری کیمی آنلاشیلماقدادیر. گؤرونن اودور کی، بوتؤولشمه بیر مرکزلی اولمایاجاقدیر. مثلن، گونئی آذربایجانلا قوزئی آذربایجان فئدئرال یا دا کونفئدئرال شکیلده بوتؤولشه بیلر.

ائلچی به یین وفاتیندان سونرا عاریف رحیموف ندنسه بو فورمولو ساختالاشدیرماغا جیددی احتییاج دویموشدور. بو احتییاج دویماسی نین دا سببینی آنکاراداکی جنوبلو اؤیرنجیلره بو شکیلده ایضاح ائتمیشدیر: "بوتؤو آذربایجاندا 4 ستراتئژیست و 4 ال چاتماز بؤیوک شخصییت وارمیش: 1. عاریف رحیموف. 2. نصیب نصیبوف. 3. دیلارا یئنیسئی. 4. عاریف کسکین. بو دؤرد نفرین عاغلی ایله حسابلاشماق لازیممیش! " . (یاخشی کی، جنوبدان دا بیر نفر بو "ستراتئژیستلر" جرگه سینه داخیل ائتمیشدیر. سؤزون دوغروسو بودور کی، عاریف رحیموفون سایدیغی 4 آدلاردان ایلک اوچو ایرانی تام اولاراق بیلمیرلر. بو دا طبیعیدیر، بیله ده بیلمزلر.مثلا بونلاردان سورسانیز کی، ایسماعلیه، شعوبیه و ایخوان الصفانین و بونلارین اوزانتیسی اولان صفویلیگین فارس تاریخی پسیکولوژیسینده ائتکیسی نئجه اولموشدور، کسینلیکله بو سوآل اوزَرینه رحیموف جنابلاری بیرجه جمله سؤیله یه بیله جک قاپاسیته ده دئیلدیر. او زامان ندن بیلمه دیگی قونولاردا فیکیر صاحیبی اولدوقلارینی ظن ائتمکده دیرلر؟ بیلگی صاحیبی اولمادان فیکیر اورَتمه ایددیعاسیندا بولونماق فاناتیک شرق دینچیسینه و موحافیظه کار مورتجع میللتچیلره مخصوص بیر اؤزَللیکدیر.آنکاراداکی حنوبلو اؤیرَنجیلرین رحیموفون بو سؤیله می ایله آلایلاری حاقدا بیر شئی سؤیله مه یه جم) آنجاق بو سؤیلنتیلرین هئچ بیر کئچرلیلیگی یوخدور. بیزه گؤره، گونئی آذربایجانین قورتاریجیلاری و فیکیر آداملاری گونئیده موباریزه آپاریب، تجروبه قازانان، زیندانا دوشن و پروفئسسیونال موباریز اولان اینسانلاردیر. بو "ستراتئژیستلر"ده کؤنلونو بو کیمی خیاللارلا خوش ساخلاسینلار، آنجاق ضرر وئرمه سینلر. قوزئی آذربایجاندا ایران تاریخی موحیطینی یاخشی تانیماما سبب اولور کی، عاریف رحیموف کیمی بعضی وطنداشلاریمیز اساسسیز و تاریخی گئرچکلرله باغلانتیسی اولمایان "تئوری!"لر اویدورسونلار. ائلچی به یین، اوزَرینده دوشونوب- داشینیب ایفاده ائتدیگی بو فورمولو رحیموف اؤزونو گونئیین و قوزئیین بیریجیک "استراتیژیستی" اولاراق آنلادیغی اوچون کلله- مایاللاق ائتمیشدیر.(عاریف رحیموف اوزون موددت الینه چیراغ آلمیش و گونئی اوچون لیدئر آختاریشینا چیخمیشدی. بیلمیرم، بو آختاریشی داوام ائدیر یا یوخ؟ آنجاق اونون بو آختاریشی نین ضرری یوخدور. بورادا ضررلی مؤوضوعلار اله آلینیر.)

عاریف رحیموف ائلچی به یین "دؤولتلشمه، میللتلشمه، بوتؤولشمه" ایفاده سینی بو شکیلده تحریف ائتمیشدیر، ساختالاشدیرمیشدیر: "بوتؤولشمه، میللتلشمه، دؤولتلشمه" ! دلیلی ده بودور کی، گویا سونرادان ائلچی به یین باشینا عاغیل قویموش و اونون یانلیشلیغینی دوزلتمیشدیر. داها دوغروسو، بئله آنلاشیلیر کی، ائلچی به یی آرخادان ایداره ائدن عاریف رحیموف ایمیش! بو سؤز اویونبازلیغی نین نه معناسی وار؟ سؤزلری اویان بویآن ائدیب و قاوراملارا موطلقییت یوکله مک هانسی پروبلئملری حلل ائده بیلر؟ یعنی بو سؤزلرین یئرلری نین دَییشدیریلمه سی ایله میللی مسئله حلل می اولور؟ بو قاوراملاری قرآن آیه سینه دؤنوشدوروب، موطلقلشدیرمک چاغداش دونیادا هانسی عکسیکلیکلری اورتادان قالدیرا بیلر؟ اوچ سؤز اوزَرینه بو قدر بئزیکدیریجی و تکرار ایفاده لر یئرینه بیر کیتابی اوخوماق داها یاخشی دئییل می؟ آیریجا عاریف رحیموف ندن بو ساختالاشدیرمایا احتییاج دویموشدور؟ گئرچکدن آذربایجانین بوتون پروبلئملری نین حللی بو قاوراملارین نئجه دوزولوشوندن می عیبارتدیر؟ مادام کی، عاریف رحیموف ایسته دیگی کیمی بو اوچ ایصطیلاحی دوزموش و "مرجع موطلق " حالینا گلدیگی اوچون، مثلن اؤز موقللیدی ائلدار قاراداغلینی دا ایناندیرمیش ایسه، او زامان هر کس عاریف رحیموف کیمی ایسته دیگی کیمی ائلچی به یین بو قاوراملاری ایله آلای ائده بیلر. یاخشی، ائلچی به یین سؤیله دیگینی زامان کئچدیکدن سونرا میللت نئجه اؤیرَنه جکدیر،هاردان بیله جکدیر کی، ائلچی به یین ایفاده لری هانسیلاردیر؟ عئینی زاماندا بو قاورام قارقاشاسی یاراتماق شرق فاناتیزمینین اؤزَللیگیندن باشقا بیر شئی دئییلدیر. بوتون بو متدلار عصرلر بویو شرقده دوشونجه نین گلیشمه سینه انگل اولموشدور. صفوی جهالتی یوردوموزو ایشغال ائتدیگی گوندن اعتیبارا بیر اوووج موفسسیرلر 12 ساختا معصومیت ایشیغینا بورونموش ایماملارین هر بیر جومله سی اوزَرینه یوزلرجه کیتاب یازمیش و "تاریخ ایماملارین دئدیگی کیمی گئتمه لیدیر، باشقا جور دئییلدیر" تلقینینده بولونموشلار. نتیجه ایسه صفوی شرقینده گؤز اؤنونده دیر. ایندی صفوی متدونون رحیموف و ائلدار قاراداغلی تیمثالیندا موقَللید و موقللَد اولاراق خورتلانماسینا تانیق اولوروق. یعنی آذربایجان بو آغالارین دیدیگی متدلا بیرلشسه بیرله شیب، بیرلشمه سی باشقا جور بیرلشمه سینی اؤنله مک لازیمدیر. بو گون اورتا دوغودا بو قدر اولایلار باش وئریر. بوتون بونلاردان اؤز منافعیمیز یؤنونده نئجه فایدالانا بیلریک ذئهنییتینی بیر یانا بوراخیب و 3 قاورام حاققیندا "تئوری" اورَتمه لیییک! حتی دونیا شرطلری بیزیم خئییریمیزه گلیشسه ده اعتیراض ائتمه لی و دئمه لییک کی، "اؤنجه فیکیرده بیرلیک یاراتمالییق، بیزه مانع اولمایین!" بیزیم داوامیز بیر سیاسی مباریزه دیر. سیاست ایسه فورصت و تهدیدلری تام زامانیندا دَیَرلندیرمکدیر.

بو وسیله ایله سایین عاریف رحیموفون بو تخریبات خاراکتئرلی تحریفلرینی شیددتله قیناییر و ائلچیبه یی تانییانلارا بیلدیرمک ایسته ییرم کی، بئله بیر شئی قطعییین اولمامیش، ساده جه رحیمفون یا خوش یا دا بد نییتلی اولاراق اویدوروغودور. بوراسینی اؤزو داها یاخشی بیلیر هر حالدا.

سادجه مسئله نی بئله آنلاماق لازیمدیر کی، "دؤولتلشمه، میللتلشمه، بوتؤولشمه" ائلچیبه یین و"بوتؤولشمه، میللتلشمه، دؤولتشمه" ایسه رحیموفون اؤنگؤرولریدیر. رحیموف دا وطنداش اولاراق آذربایجان اوچون بیر فورمول اؤنَرمه حاققینا صاحیبدیر. آنجاق ندن رحیموف اؤز سؤیله دیگینی ائلچی به یین آدینا چیخماقدادیر؟ نییه دئمیر کی، بو منیم، او دا ائلچی به یین سؤیله دیکلریدیر؟ بو شکیلده اولورسا آذربایجان میللی حیاتیندا هر آلاندا دوشونجه پلورالیزمی اوچون ده مئیدان آچیلیر. من اؤز-اؤزومدن سوروشورام: "گؤزلریمله گؤروب، قولاغیملا دویدوغوما اینانیم، یوخسا رحیموفون خارئکتئریندن قایناقلانان قاورام قارقاشاسی یاراتما ایستعدادینامی؟ دیگر بیر سورو دا شؤیله: سایین ائلدار قاراداغلی صفویت پسیکولوؤیسینی بیر باشا تبریزده یاشامیش بیریسی ایکن، ندن "مرجع تقلید" مسئله سینی میللی حرکته داشیماق ایسته ییر؟ ذاتن بو قاوراملارین هئچ بیری نین ائله اؤنملی بیر تاثیری ده یوخدور. میللتین قورتولوشو 3 قاوراملا حیاتا کئچمز. بونلار موسلمانلارین ایمان گتیردیگی دَییشیلمه سی مومکون اولمایان قران آیه لری کیمی دئییلدیر کی. هر کس نئجه ایسته ییر او شکیلده ده تئوری اورَتسین. ائلچیبه یین تئوریسی اؤیله سینه، رحیموفون سؤیله دیگی ده بؤیله سینه دیر. سوآل سوروشورام: ندن ائلدار قاراداغلی هئچ بیر آراشدیرما آپارمادان، یالنیز مرجعیت منطیقیندن یولا چیخاراق رحیموفا ایمان گتیرمیشدیر؟ آخی 1999-جو ایلده منیم ده ایشتیراک ائتدیگیم توپلانتیدا کاسئتلره آلینمیشی دا قالان ائلچیبه یین سؤیله دیگی ایله رحیموفون سؤیله دیگی عئینی دئییلدیر. بونو پروبلئمه دؤنوشدوروب هنگامه یاراتماغا نه احتییاج وار!؟ اینسان گؤزویله گؤروب، قولاقلاریلا ائشیتدیگینه اینانمالیدیر، یوخسا یالانلارا می؟ بو گون گونئی آذربایجاندا دؤولت اولما یولوندا موباریزه گئدیر، اینسانلار زیندانلارا دوشور. ائلچیبه ی ده بیرینجی اولاراق دؤولتلشمه دئدیگینده بونو نظره آلمیشدیر هر حالدا. گونئیله قوزئیین بیرلشمه سی غرب مدنییتی نین ایشیغیندا ایکی موستقیل آذربایجان دؤولتی آراسینداکی آنلاشما و پلانلاما ایله اولا بیلر هر حالدا. اؤز-اؤزونه اولمایاجاقدیر. دیگر طرفدن، فرض ائدک عومومییتله ائلچیبه ی بو سؤزو دئمه ییبدیر. او زامان آذربایجان اؤز میللی یازقیسی یولوندا موباریزه آپارمامالیدیر می؟ بیر آز داها ایره لی گئدیب و بو شکیلده دوشونک: اگر بیریسی ائلچی به یی عومومییتله قبول ائتمه سه ، گونئی آذربایجانین طالعیی اوغروندا موباریزه آپارماق حاققی یوخ مو؟ عاریف رحیموف اؤز تئزینی ائلچیبه ی آدینا چیخماقلا جنوبداکی حرکتی ده جایدیریجیلیغا سؤوق ائتمک نیتینده دیر سانکی. بلکه شعورلو شکیلده بئله بیر آماجی اولماسا دا، آنجاق عمللری بونا خیدمت ائتمکده دیر. عئینن قوزئیده ائتدیکلری کیمی. عاریف رحیموفا گؤره آذربایجانین دوشمنلری نه ائرمنی نه ده فارس ایمیش! آذربایجانین دوشمنی "یوردچولار" ایمیش. اونا گؤره ده ایشینی- گوجونو بوراخیب "آذربایجان خالق جبهه سینده یورد فراکسیونو" آدیندا بیر "کیتاب!" دا یازدی. بو کیتاب، وطنداش آراسیندا گوونسیزلیک و نیفاق یاراتماقدان باشقا هئچ بیر شئیه خیدمت ائتمه دی. "یورد" و "خالق جبهه سی" کیمی اولقولار آذربایجان تاریخی نین گئرچکلری و زامانا گؤره اورتایا چیخیب سونرا یوخ اولان و باشقا تشکیلاتا چئوریلن حادیثه لردیر. عاریف رحیموف بو تخریباتینی گونئی آذربایجانداکی حرکته ده داشیماق ایسته میشدیر، سانکی. آنجاق بونا البتده کی، ایذن وئریلمز.

اومید ائده لیم کی، سایین عاریف رحیموف بو خطالی، بؤلوجو داورانیشینی آنلار و ائلچی به یی ساختالاشدیردیغینی اعتیراف ائدر، قاش قاییردیغی یئرده گؤز چیخارتماز. عکس تقدیرده حیاتینی آذربایجانین یازقیسینا آدامیش ائلچیبه ی کیمی دَیَرلی بیر اینسانین شخصیتی یالانلار دومانلیغی ایچینده مرموزلاشا بیلر و بو شکیلده میللی اخلاقین دا ائروزیونا اوغراییب، جیدییتینه خلل گله بیلر. بؤیوک شخصییتلرین فیکیرلرینی ساختالاشدیرماق، میللته چوخ ضرر وئره بیلر. بو ائروزیونا اوغرامانی انگللمک آماجی ایله بو بیلگینی آذربایجان تاریخینه سونماق ایحتییاجینی حیسس ائتدیم.





[1][1] م. ع. اکبر صابیر ایسلام جغرافیاسینی فیتنه جغرافیاسی اولاراق تانیملار. کلیماتولوژیک وئریلر صابیرین بو سؤیله دیکلیرینی دستکلر یؤنده دیر. صابیر دئییر: "فیتنه گؤوَریر تورپاغیمیزدان داشیمیزدان...". ایستیسنا تورپاقلار نظره آلینمازسا ایللیک اورتالاما یاغمور ایسلام جغرافیاسیندا 35-15 سانتیمتر آراسیندا دَییشیر. بو میقدار ایلیک اورتالاما حسابلا آوروپا جغرافیاسیندا 200-150 سانتیمتر آراسیندادیر. ایندی ندن بیزیم کولتورده "یاغمور دوعاسی" وار آیدین اولور.