باکيدا چاپدان چيخميش

      "عباس ميرزا و آذربايجان"

کيتابينين اؤنسؤزو

   

                      عزيز اوخوجو! 

                      گونئي آذربايجاندا فارس شووينيستلري نين تورکلري سويسوزلاشديرما پلانلاري حاقدا  بيلگينيز واردير. آذربايجان تاريخيني و گؤرکملي شخصييتلريني ايران مرکزلي بير ياناشما ايله فارس کيمليگينه، فارس تاريخينه عايد ائتمه يه چاليشيرلار. بوتون دؤولت ايمکانلاري دا فارس ذهنييتي مرکزلي سيستئمين الينده اولدوغو اوچون بو ايشده باشاريلي اولموشلار. آذربايجاندا اويانيشين و ميللي کيمليگين يوکسلديگي بير واختدا تاريخي گئرچکلرين اولدوغو کيمي درک ائديلمه سينه جيدي احتيياج واردير. ترجومه ائتديگيم "عباس ميرزا و آذربايجان" آدلي کيتابين بو احتيياجي برطرف ائتمکده چوخ تاثيرلي اولاجاغينا اينانيرام. ياخين تاريخيميزين بيلينمه سي باخيميندان کيتابدا گئرچکدن گئنيش بيلگيلر وار. ايلک دفعه  اولاراق 19- عصرده آذربايجان اوردوسونون قورولماسي و ايلک دفعه  اولاراق دا قاجار شاهزاده سي عباس ميرزا نين باشچيليغي ايله آذربايجانين بوتؤولوگو اوغروندا سيلاحلي ساواشين تفرعاتي حاققيندا گئنيش بيلگي الده ائده جکسينيز.  

  شاهزاده، شرقده ايلک سياسي شخصييت اولاراق سئکولار بير دؤولت قورماق ايسته ميش، بو سببدن ده فارس ميللييتچيليگي مرکزلي شيعه موللالاري نين اعتيراضينا توش اولموشدور. بونا قارشيليق اولاراق عباس ميرزا آذربايجان مرکزلي دين پروژئسيني گليشديرمگي دوشونموشدور. بو ايستيقامتده اؤزلليکله ده روسييا ايمپئراتورو پيوترون رئفورملاريندان دا تاثيرلنميش، اونون ساققال اينقيلابيني آذربايجاندا گئرچکلشديرمک نييتينده بولونموشدور. بو ايشيني ايلک اؤنجه آذربايجان اوردوسونون عسگرلري اوزرينده تطبيق ائتميش، هر کسين آوروپاليلار کيمي ساققاليني قيرخماسينا امر ائتميشدي. شاهزاده نين بو عملي دين خاديملري نين چوخ جيدي اعتيراضينا سبب اولموشدور. چونکو آخوندلارا گؤره ساققال قيرخماق ديني عادت- عنعنه لره اويغون گلميردي. 

  شاهزاده، قاجارييه دؤولتينده و آذربايجان اوردوسوندا خيدمت ائدن فرانسانين حربي موتخصيص و موهنديسلري واسيطه سي ايله 1789- جو ايل بؤيوک فرانسا اينقيلابي نين مودئرن طلبلري ايله تانيش اولموش، دريندن تاثيرلنميشدير. بو سببدن ده هم پايتاختي تبريزه کؤچورمک، هم تورک ديليني قاجار ايمپئراتورلوغونون رسمي دؤولت ديلي اولاراق اعلان ائتمک، هم ده 19-جو عصر شرطلرينه گؤره سئکولار بير دؤولت قورماق ايسته ميشدير. بونون اوچون آذربايجانين حربي، مدني و ايقتيصادي حياتي نين مودئرنلشمه سي ايستيقامتينده بير چوخ رئفورملار گئرچکلشديرميشدير. آنجاق عباس ميرزا نين ايصلاحاتلاريني دوردورماق اوچون دين خاديملري نين تلقيني ايله آتاسي فتحعلي شاه اونو آذربايجاندان اوزاقلاشديرماق زوروندا قالميشدير. خوراساندا وفات ائدن عباس ميرزا سون نفسينده "آذربايجان، آذربايجان"- دئيه گؤزلريني يومموشدور.  

             کيتابدا 19-جو عصر دونيانين بؤيوک دؤولتلري نين اورتا دوغو و مرکزي آسييا ايله باغلي پلانلاري، شاهزاده نين ديپلوماتيک و حربي مانئورالاري حاققيندا هرطرفلي بيلگي واردير. بو بيلگيلر 19-جو عصرين بيرينجي ياريسيندا قاجارييه ده خيدمت ائدن فرانسا، اينگيلتره، روسييا کيمي خاريجي دؤولتلرين تمثيلچيلري نين رسمي مکتوبلاريندان و شخصي خاطيره لريندن آلينميشدير. ان اؤنملي اولان دا بودور کي، او زامانکي ساواشلار فارسلارين و روسلارين  اويدوردوقلاري کيمي ايران- روسييا آراسيندا دئييل، قاجارييه- روسييا آراسيندا باش وئرميشدير.  بو ساواشين باش ايفاچيلاري ايسه قاجارييه نين آذربايجان اوردوسو ايله روسييانين قافقاز اوردوسو اولموشدور. داها آيرينتيلي بيلگي اوچون کيتابي ديققتله اوخوماق لازيمدير. ترجومه ده بلکه بوگونکو آليشيلميش آذربايجان تورکجه سيندن بير آز فرقلي اوصلوبا راستلانا بيلرسينيز. بونلار شعورلو شکيلده ائديلميشدير. کيتابدا درينلشديريلميش و اؤز کؤکو اوستونده دوغوب- دوغورا بيله جک آنا ديليميزين ايمکانلاريندان گئنيش شکيلده فايدالانماغا چاليشيلميشدير.  

   

 گونتاي جاوانشير - فينلاندييا

20.04.2007 

  Guntay_1@yahoo.com