صالئح کامراني

 

آزادليغا دوغرو حرکت

       چاغيميزدا اينسان حاقلاري دوشونجه ده و اؤزلليکله اولوسلاراراسي ايليشکيلرده حاکيم سؤيلم حالينا گلميشدير. ان ديکتاتور حؤکومتلر بئله، بو سؤيله مه قارشي آچيقجا چيخا بيله جک جورأتده دئييللر. هئچ بير کيمسه و هئچ بير حؤکومت سؤزده ده اولسا اينسان حاقلاري سؤيله ميني اينکار ائتديکلري اوچون ايفتيخار ائتميرلر. باخماياراق کي، عومومييتله حوقوق و موشخخص شکيلده ايسه اينسان حاقلاري سياسي ايقتيدارلارين تاثيريندن کناردا قالا بيلميه ميشدير. بو دوروم گليشمه ميش اؤلکه لرده داها قاريشيق شکيلده مؤوجوددور. "دونيا اينسان حاقلاري بيلديرگه سي (بيانييه سي)" قبول ائديلديگي گوندن اعتيبارن چتينليکلرله قارشي- قارشييا گلسه ده، حاکيم پاراديقما حالينا گلميشدير. آنجاق مدني، سياسي، ايجتيماعي، ائکولوژي، باريش و ايقتيصادي پلاندا هله ده اينسان حاقلاري سؤيله مي آخساق دورومدادير.   

       بيزيم ياشاديغيميز اؤلکه ده اينسان حاقلاري سؤيله مي بير چوخ ايديعاچي شخصلر و قروپلار اورتايا چيخارميشدير. هر کس اؤز بسيط و رئالليقلارلا اؤرتوشمه ين تصوورلري ايله بو اؤنملي و ائورنسل مؤوضوعيا ياناشماقدادير. ايراندا حاکيم اولان ايقتيدار اينسان حاقلاري آنلاييشي نين نيسبي اولدوغونو ايديعا ائده رک، نظري و پراتيک پلاندا بو ائورنسل (جاهانشومول) پاراديقماني آنلاماق ايسته مه مکده دير. بونا قارشيليق اولاراق اينسان حاقلاري سؤيله ميني دونيا سوييه سينده گؤرمه ايديعاسيندا اولان قروپلارا راستلانيريق کي، تئوريک و پراتيک پلاندا سانتراليستيک گؤروشدن قايناقلانان ضعيفليکلردن دولايي اونلار دا بير شکيلده ايرانداکي ايقتيدار کيمي دوشونمک زوروندا قالميشلار. بو قروپ دا اينسان حاقلاري سؤيلميني جاهانشومول پاراديگما اولاراق دگرلنديرمه سينه رغمن، بو کونسئپتين حياتا کئچمه سينده ماراقلي گؤرونمورلر. بو گيريشدن سونرا گونئي آذربايجاندا اينسان حاقلاري مؤوضوعسونو تحليل ائده جه ييک.  

    

گونئي آذربايجان ميللي حر کتي نين ماهييتي اوزرينه آراشديرما

       بو موباحيثه يه گيرمک اوچون گونئي آذربايجان ميللي حرکتي اوزَرينه عومومي و گئنيش بير ايشاره ائتمک مجبورييتينده يم. حوقوق علمينده، اؤزلليکله اساسي و مدني حوقوقدا، حوقوق تاسيساتلاريني آناليز ائتمه نين مئتودو او مسئله نين حوقوقي ماهييتيني آراشديرماقدان عيبارتدير.  بو مقاله ده ده اله آلديغيميز مسئله نين اينسان حاقلاري ايله باغلانتيلي اولدوغوندان دولايي بو آناليستيک مئتوددان يارارلاناجاغام. هفته ليک  " شمسي-تبريز " قزتيني محکمه ده ساووندوغوم زامان ايلک دفعه اولاراق بو مئتوددان فايدالانميشديم. آنجاق قارشي طرفين اعتيناسيزليغي اوزوندن بو مئتودون هئچ بير تاثيري اولماسا دا، ميللي آکتيولرين باخيشلاريندا اولايلارا حوقوقي ياناشما ذهنييتينه گئنيش تاثير بوراخميشدير.   

    

گونئي آذربايجان ميللي حرکتي نين  عئيني  و ذهني زميني

       سويوق ساواش بيتديکدن و سووئتلر بيرليگي نين چؤکوشو ايله سول ايدئولوژي نين اولدوزو سؤندوکدن سونرا صنعی شکيلده کناردا ساخلانميش مودئرن فلسفه دونيا توپلوملاري نين متنينه داخيل اولماغا باشلاميشدير. سانتراليست، توردئشلشديرمه و بوتونجو گؤروشلرين فيکير نيظاملاري داغيلديقدان سونرا دونيا فيکير، فلسفه، صنعت و سيياست آچسيندان پلوراليزمي ترجيح ائتميشدير. بو کؤکلو دگيشيملر تئکنولوژيک، ايله تيشيم، پوليتيک و فيکير نيظاملار پلانيندا تظاهور ائتميشدير. بوتون بو دگيشيملرين نتيجه سينده ميللي کيمليک مسئله سي اورتا دوغودا، اؤزلليکله گونئي آذربايجاندا تاريخي ضرورت اولاراق شکيللنميشدير. البتته يئني دونيا دوزه ني نين بيچيملنمه سينده تاثيرلي اولان بو دگيشيمين ائتکيسيني هله ايستيقراري اولمايان و گليشمکده اولان اولوسلارآراسي ايليشکيلرده ده گؤرمک مومکوندور. بوتون بو دگيشيکليکلر اينسان حاقلارينا موناسيبتده اوچونجو نسلين دوغوشونا شرايط ياراتميشدير. بو اوچونجو نسل 1992-جي ايلده گئرچکلشن دونيا اينسان حاقلاري کونفئرانسيندا اؤز وارليقلاريني دونيايا دويوردولار. بو نسل اينسان حاقلاري آنلاييشينا يئني آنلام يوکله يَرک، بو آنلاييشين نيسبي اولماديغني، بوتون دونيا ميللتلري اوچون کئچرلي اولدوغونو وورقولاديلار. باخماياراق کي، عمل و دوشونجه ساحه سينده بو عکسيکليکلر هله ده داوام ائتمکده دير.   

  دونيا افکاري-عوموميسينده باش وئرن بو اؤنملي دگيشيکليکلر قوزئي آذربايجانين باغيمسيز دؤولت اولاراق تاريخ صحنه سينه چيخماسي ايله بير يئرده گونئي آذربايجان اهاليسي نين دوشونجه سيني و دويغولاريني ميللي ايستيقامتده دريندن تاثيرلنديرمه يه باشلادي. خوصوصن اينتئرنئتين سرحدلري سؤکمه سي ميللتيميزين دوشونجه سي نين مودئرنلشمه سينه تکان وئرميشدير. بوتون بونلارين هاميسي بير يئرده ال-اله وئره رک 20-جی عصرين سونلاريندا گونئي آذربايجان ميللي حرکتي نين فيکير اساسلاريني تشکيل ائتمه يه يارديمچي اولموشدور. قاراباغ ساواشي، ائرمنيستانين آذربايجان تورپاقلاري نين 20% ايشغال ائتمه سي، خوجاليدا ميللتيميزه قارشي سويقيريمين تطبیق ائديلمه سي و بو حاديثه لره ايران دؤولتي نين دولايلي و يا دولايسيز شکيلده يارديمچي اولماسي گونئي آذربايجاندا ميللي ويجدانين اويانيشينا تکان وئردي. چونکو يئني موستقيل اولموش شيمالي آذربايجانا قارشي يورودولن بو عدالتسيزلييه گونئي آذربايجان سئييرجي قالا بيلمزدي. شکيللنميش اولان ميللي کيمليک و ميللي کيمليک زمينينده اولايلارا موناسيبت گؤسترمک، قاراباغ ساواشينا قارشي اولان رئاکسيون اولاراق اورتايا چيخميشدي. گونئي آذربايجاندا بيچيملنمه سورجيني ياشايان ميللي کيمليک ايلک اؤنجه دوغال اولاراق گنجلر آراسيندا اورتايا چيخميشدير. طلبر آراسيندا سيويل يوللا گؤستري و اعتيراضلار بو وسيله ايله مئيدانا گلميشدير. زامان کئچديکجه گونئي آذربايجان اهاليسي اؤز ميللي کيمليگي نين و ميللي حاقلاري نين ميقياسي حاققيندا داها دا گئنيش بيلگييه صاحيب اولوردو. ميللت اؤز ميللي حاقلاريني مؤوجود آناياسي نين ايذن وئرديگي چرچيوه ده ديله گتيريردي. 90-لي ايللرده ميللي حرکتين طلبه لر آراسيندا داها دا يايقينلاشماسينا تانيق اولوروق. بو ايللرده ائله بير اونيوئرسيته يوخدور کي، اورادا تحصيل آلان آذربايجانلي طلبه لر ميللي ديلده شعر و موسيقي گئجه سي دوزنله مه سينلر. خاطيرلاييرام کي، 1371-جي (شمسي) ايل ايدي. 10 گون ايدي شيراز اونيوئرسيته سينده درسه باشلاميشديم. اونيوئرسيته ده بير تئاتر پروقراميندا تورکلري تحقير ائتديکلري اوچون آذربايجانلي طلبه لر بير يئره توپلاشيب اعتيراض ائتديلر. طلبه لرين اعتيراضي نتيجه سينده اونيوئرسيته نين رئکتورو رسمن عذر ايسته مک زوروندا بوراخيلدي و تئاترين داواميني دوردوردو. او زامان طلبه لره روح يوکسکليگي وئرن خوصوصن  " آذربايجان ارمغاني " درگيسي نين رئداکتورو ايرج سولئيمانزاده ايدي. اونون داورانيشلاري بيزده اؤزوموزو گووه ن دويقوسونو آرتيردي. بو اؤزوموزه گووَن، داها سونرا اونيوئرسيته ده موختليف ميللي مضمونلو پروقراملار دوزنله مه شکلينده تظاهور ائده جکدي. بو چاليشمالار تئهران، تبريز، اورمو و ديگر شهرلرين اونيوئرسيته لرينده داها سورعتلي اولاراق داوام ائديردي. گون کئچديکجه کيمليک اوغرونا باشلايان موباريزه اؤزونه داها چوخ طرفدار بولور و داها چوخ ميللتين درينليکلرينه نوفوذ ائديردي. چوخ کئچمه دن بو ميللي اويانيش اؤز وارليغيني ميللي مجليسه ميللت وکيلي سئچيمي نين 5-جي مرحله سينده اورتايا قويدو. دئمک اولار ايلک دفعه  اولاراق بو سئچيمده تبريز اهاليسي اؤز کيمليکلرينه شعورلو شکيلده سس وئرديلر. ميللي حرکت مطبوعات پلانينا دا سيچرادي. "اوميدي زنجان"، "نويدي-آذربايجان"، "شمسي-تبريز"، کيمي قزئتلر گونئي آذربايجانين ميللي ايستکلريني هايقيران مرکزلره دؤنوشدولر. بو قزئتلر ميللتين اويانيشيندا حقيقتن ده بؤيوک رول اويناديلار. 80-لي (شمسي) ايللرين باشلاريندا گئنيش خالق کوتله سي نين گونئي آذربايجان ميللي حرکتينه قاتيلديغينا تانيق اولدوق. تاريخده هئچ بنزري اولمايان بابک قالاسي قورولتايلاري گونئي آذربايجان ميللي حرکتينه بؤيوک حئيثييت و شرف قازانديردي. بو گئنيش خالق کوتله سي نين آياغا قالخماسي ايله بير يئرده گوندن-گونه آرتان قزئتلر، درگيلرده ميللي شعورون درينلشمه سينه تکان وئريردي. ميللتين اويانيشيندا بؤيوک روللاري اولان بعضي شخصييتلرين و نشريياتلارين روللاريني دا خاطيرلاتماق گره کير. داخيلده و خاريجده زحمت چکن بو فداکار اينسانلارين امگي نتيجه سينده 80-لي ايللرين تام اورتاسيندا، يعني 1385- جي ايلده گونئي آذربايجان ميللي حرکتي اؤز وارليغيني و گوجونو بوتون دونيايا اعلان ائتدي. خورداد آيينين اوللرينده گئرچکلشن سيويل خيابان يوروشلري ايثبات ائتدي کي، گونئي آذربايجان ميللي حرکتي نين کؤکلري خالقين بوتون طبقه لري نين ايچيندن قايناقلانماقدادير. خورداد حرکتي ميللتين ايچينده داغينيق شکيلده مؤوجود اولان ميللي ائنئرژيني بير ايستيقامتده مرکزلشديرميشدير. شوبهه سيز کي، بو حرکتين شکيللنمه سينده و مؤحکملنمه سينده تاريخ و ادبييات ساحه سينده چاليشان اينسانلاريميزين چوخ بؤيوک تاثيري اولموشدور. گونئي آذربايجان ميللي حرکتي نين فلسفه سيني و درينليگيني بير نئچه سطيرده سؤيله مک مومکون دئييلدير. بو مقاله ده حرکتين درينليگينه جوزيي ايشاره ائده رک، اونون حوقوقي طرفيني تحليل ائتمه يه چاليشاجاغام.   

گونئي آذربايجان ميللي حرکتي نين ماهييتي

  داها اؤنجه سؤيله ديگيم کيمي، تاسيسلرين و حوقوقي مرکزلرين ماهييت قازانماسي چاغيميزدا حوقوق علمينده چوخ کئچرلي اولان بير مئتوددور. بو مئتود مسئله لرين نتيجه سي نين فهمينه يارديم ائتمکده دير. گونئي آذربايجان ميللي حرکتي ماهييتي نين اينسان حاقلاري ايله سيخ باغليليغي سببي ايله بو مئتوددان حرکتين تحليلي اوچون فايدالاناجاغام. آناليزين بو مئتودو ايستيقرارليدير و آناليست موختليف مؤوضوعلارين تمللريني الده ائتديکدن و وئريلرين اؤزلليکلريني لغو ائتديکدن سونرا تحليل ائديلن مؤوضوع ايله باغلي قطعيي بير قرارا وارا بيلير. اؤرنگين، بيز آليش-ساتيش، ايجاره، سيقورتا کيمي حوقوقي تاسيسلرله قارشيلاشديغيميزدا گؤروروک کي، بو حوقوقي مرکزلر ايکي ايراده نين سونوجا اولاراق مئيدانا گلميشلر. بو اوزدن ده بئله قرارا گليريک کي، بو مرکزلر آنلاشمايا دايانماقداديرلار. بو سببدن ده بو مؤوضوعلارلا باغلي آنلاشمانين قراريني بير حوقوق آراشديرماچيسينا وئرمه ليييک. مثلن بير قاضييه، حوقوقچويا، عدلييه وکيلينه، قانون يازانا و س. عکس تقديرده گرکن نتيجه يه چاتا بيلميه جه ييک. مثلن بو حوقوقي مرکزلر قارشيسيندا ائله وضعيتلر وار کي، حوقوق علمينده اونلاري ايکي ايراده نين قارشيليقلي نتيجه سي کيمي آنلاماق مومکون دئييلدير. مثلن بير حوقوق حاديثه سي اولاراق قتل مسئله سي بونا عايددير. اگر قتل حاديثه سيني بير موقاويله اولاراق آنلارساق، او زامان قبول ائتمه ليييک کي، بيري ديگرينه اونو اؤلدورمک اوچون ايذن وئرميشدير. يعني مقتول قتل ائديلمه سي اوچون قاتيلله آنلاشميش کي، قتل قارشيليغيندا اونون واريثينه قاتيل بير مبلغ اؤدميش اولسون. بيليرسينيز کي، بو ايش عومومي دوزن و اينتيظاملا قارشي-قارشييا گلديگي اوچون اولاسي دئييلدير. بو اوزدن ده آنلاشيلديغي اوزره هر حاديثه يه اونون اؤز ماهييتي اساسيندا ياناشيلماليدير. هر هانسي حاديثه يه آدامين کؤنلو ايسته ديگي کيمي بير ماهييت وئرمک دوغرو و حوقوقي اولا بيلمز. بير حاديثه  نين ماهييتيني معين ائتمکده شخصلر و يا قروپلار سهو ائده بيلر و يا عاغيللارينداکي ماهييتي باش وئرميش حاديثه دن چيخارماغا چاليشا بيلرلر، لاکين اگر باش وئرميش حاديثه، معلوم گئرچکلر و وئريلره داياناراق ديقتله و غرضسيز شکيلده آراشديريليرسا، تقريبن بوتون آراشديرماچيلار اورتاق بير نتيجه يه واراجاقلار. شوبهه سيز کي، مسئله نين نظري پلاندا اولدوغونو دوشوندويوموزده آناليزده خطا ائتمه ايمکاني دا اولا بيلر. بو باخيمدان من ده بو قانونا اويغونلوغون ايستيثناسي دئييلم. بو مئتودون ديگر بير اؤرنگي سياسي و ايجتيماعي حاديثه لرين تحليلي ايله باغلانتيلي اولاراق، دؤولت حوقوق تاسيسلرينه مخصوصدور کي، يوز ايللردير سياسي فيلوسوفلارين، حوقوقچولارين و فيکير آداملارينين ديقتيني جلب ائتميشدير. دؤولتين ماهييتيني تعيين ائتمک باخيميندان بير نئچه گؤروش اورتادا مؤوجوددور. بير قروپ، دؤولتين ماهييتي نين تملينده زورون دوردوغونو اؤنه سورورلر. بونلارا گؤره حيات اوغرونا موباريزه ده زورلولار ديگرلرينه غاليب گليب و دؤولت آدلانان سياسي تاسيسي قوروب ايداره ائديرلر. بو گؤروش بير چوخ گئري قالميش اؤلکه لرده کئچرليليگيني عملن قوروسا دا، آنجاق مودئرن سياسي فلسفه لر طرفيندن قبول ائديلمه ميشدير. بو گؤروشو ساوونانلار دؤولتين مشروعيتي نين قايناغيني آللاه اولاراق گؤرورلر و دؤولتي ايداره ائدنلر ده ايستر-ايسته مز آللاهين يئر اوزونده کي  نوماينده لري کيمي اؤزلريني تقديم ائديرلر. ديني حؤکومتلري و سلطنت طلبلري بو جرگه يه داخيل ائتمک مومکوندور. قارانليق اورتا چاغين قاپانماسي و آوروپانين مودئرن چاغا گيرمه سي ايله عئيني زاماندا دؤولتين ماهييتي ايله باغلي اولان گؤروشلرده بؤيوک دگيشيکليکلر اورتايا چيخدي. هئگئل، مونتئسکيو و ژانژاک روسسو کيمي فيلوسوفلار دؤولتي ايجتيماعي بير آنلاشمانين نتيجه سي اولاراق دگرلنديرديلر. بئله ليکله دؤولتين قورولوشوندا اساسن اينسانلاري و اؤزلليکله ده ميللتلري تاثيرلي اولاراق گؤردولر. غربين بو کيمي سياسي فلسفه چيلري اينسانليق مدنييتينه بؤيوک اثرلر ميراث بوراخميشلار. بير سياسي، ايجتيماعي و ايقتيصادي مرکزهانسي علمي، نظري و حوقوقي خوصوصييتدن برخوردار اولسا، او مرکزين تاثيرلري و نتيجه لري ده اونا گؤره دگيشه جکدير. بو سببدن ده ماهييتي ايجتيماعي آنلاشمالار اولاراق بيلينن بير دؤولتين دئموکراسييه، اينسان حاقلارينا، ايجتيماعي آزادليقلارا، دونيا باريشينا، چئوره حاقلارينا اولان موناسيبتي تئوکراتيک دؤولتله موقاييسه ده کؤکوندن فرقلي و تضادلي اولاجاقدير. چونکو ايجتيماعي موقاويله لرين نتيجه سي اولان دؤولت عقلي بير فئنومن ايکن، تئوکراتيک بير دؤولت غئيري-عقلي و غئيري- حوقوقي بير فئنومندير. بو باخيمدان گونئي آذربايجان ميللي حرکتي نين تحليلينده بير فايدا وار دئيه دوشونورم. بونون ان اؤنملي فايداسي بو حرکتي تانيماق ايسته ينلر اوچون نظري باخيمداندير. ايکينجي اولاراق دا عمل پلانينداکي فايدادير. بو حرکتين ياراديجيلاري، حرکتين موخاطيبلري، حتّی بو حرکتين موخاليفلري اوچون عملده ده بير فايدا وار. گونئي آذربايجان ميللي حرکتي نين ماهييتيني بو باخيمدان آشاغيداکي عنصورلردن عيبارت سايماق اولار:  

  1. بو حرکت ميلليدير. يعني بو حرکت ناسيوناليست بير ماهييته صاحيبدير و آذربايجان تورک ميللتي نين تاريخي، مدني، ديل و جوغرافي کيمليکلريني تثبيت ائتمک يؤنونده دير. بير سؤزله بو حرکت آذربايجان آديندا بير اولقونو سياسي، مدني و تاريخي پلانا داشيماقدا قرارليدير. دونيا ميقياسيندا باش وئرن فيکري، ايدئولوژي و سياسي زمينده کي  حاديثه لر بو باخيمدان گونئي آذربايجان ميللي حرکتيني دريندن ائتکيله مکده دير. بو اوزدن ده بو بؤيوک حرکتي اجنبيلرين قيشقيرتيسي اولاراق دگرلنديرنلر و يا بو حرکتي کئچيجي و اؤتري ائتنيک حيسسييات اولاراق گؤرنلر سهو ائديرلر، بؤيوک بير يانيلقي ايچينده ديرلر. بونلار يا يانيليرلار، سهو ائديرلر يا دا بو تاريخي پروسئسي درک ائديرلر، آنجاق اعتيراف ائده جک جسارتده دئييللر. بونلار 1385-جي ايل خورداد قيياميني دا بو دار بوجاقدان باخاراق تحليل ائتديکلري اوچون، بو مؤحتشم خالق قيياميني سادجه "ايران" قزئتي نين ائتديگي ادبسيزلييه قارشي رئاکسيون اولاراق گؤردولر. باخماياراق کي، "ايران" قزئتي نين ائتديگي بو ادبسيزليک داها سونرا "آفتاب يزد"، "مردم سالاري"، "زن روز" قزئتلرينده تکرار ائديلدي. لاکين بو تحقيرلره آذربايجان تورک ميللتي عکس العمل گؤسترمه دي. آذربايجان خالقي نين بو ظاهيري سسسيزليگي اونلاري اؤز تحليللرينده خطايا سورکله دي. چونکو اونلار گونئي آذربايجان ميللي حرکتي نين فيکري، حقيقي و تاريخي قايناقلاري اوزَرينه علمي تحليل ائده جک قاپاسيته دن محرومدورلار. اونلارين خطالاريني ايفشا ائدن بير حاديثه گئرچکلشدي. 1386- جي ايلده آذربايجان تورک ميللتي خورداد اينقيلابي نين ايلدؤنومونو تکرار گونده مه گتيردي. بللي اولدو کي، صؤحبت بير و يا بير قزئتين تحقيريندن گئتمير. آذربايجان تورک ميللتي 1385- جي ايلده وطنين قورتولوشو اوغرونا وئرديگي شهيدلريني اونوتماميشدير. گونئي آذربايجان ميللي حرکتيني بئله دار باخيشلارلا تحليل ائدنلر دونيادا، اورتا دوغودا و گونئي آذربايجاندا گئدن درين تاريخي، فيکري پروسئسلردن خبرسيزديرلر. آذربايجان شهرلرينده "هاراي هاراي من تورکم" باغيران ميليونلارجا تورک اينساني بو حرکتين بير کيمليک اوغرونا اولدوغونو ايثباتلادي. آنا ديلينده تحصيل ايستکلري، دونيا آنا ديلي گونونو قوتلامالار، 12 ويلايتدن سيلينن آذربايجان آدي نين تکرار بو يوردلارا گئري قايتاريلماسي اوغرونا سيويل ايستکلر، خوجالي سويقيريميني آنمالار گؤستردي کي، گونئي آذربايجانداکي خالقين ميللي شعورونون يوکسليشي قطعيين تصادوف دئييلدير، بير ضرورتدير. درک ائديلميش بير ضرورتدير.   

  گونئي آذربايجان ميللي حرکتي نين بو کيمي داورانيشلاري اونون سرحدديني موعينلشديردي و ديگر ايدئولوژيک، قبيله وي و ايجتيماعي حرکتلردن فرقلنديردي. بو معنادا کي، بو حرکت آذربايجان تورکلوگونون ميللي حاقلاري نين ديريليشينده؛ ديلدن توتموش تاريخه، ادبيياتا و جوغرافييايا قدر بوتون ساحه لرده ايصرارلي گؤرونموشدور. بو اوزدن ده گونئي آذربايجان ميللي حرکتي نين آماجي بير چوخ ساغ-سول ايدئولوژيلرين ايديعالاري نين ترسينه اولاراق، بوتون بشرييتين پروبلئميني حلل ائتمکدن عيبارت دئييلدير. بو حرکتين موشخخص هدفي واردير. بو هدف ده دونيا گئرچکلري اورتاميندا گونئي آذربايجانين ميللي ظولمدن قورتولوشودور. بو مؤوضوع چوخ اؤنمليدير و گونئي آذربايجان ميللي آکتيويستلري بونا جيدي شکيلده ديقت ائتمه لي، بو حاقدا آنلامسيز موباحيثه لردن چکينمه لي و جيدي شکيلده بوتون ائنئرژي ايله ميللي هدفلر يولوندا چاليشماليديرلار. بو وطنين و بو حرکتين صاحيبلري وار. آذربايجانين عاقيبتي ايله باغلي بوتون مسئولييتلر اونلارين، بو وطنین صاحیبلری اوزَرينه دوشمکده دير. آذربايجانين قورتولوشونو دوشونمه ين فردلر و تشکيلاتلار وطنيميزين منافعييني دوشونمه ديکلري اوچون بيزدن دئييللر، اونلار هر حالدا بيزيم جبهه ده دئييللر. بو نه دئمکدير؟ بونون آنلامي ندير؟ بو، او دئمکدير کي، گونئي آذربايجان ميللي حرکتي ميللت ياراتما پروژه سيني حياتا کئچيرمک ايسته يير و ائنئرژيسيني باشقا هدفلره خرجله مه يه جکدير. بيزيم سياسي پروژه ميز آذربايجان تورک ميللتيني اولوشدورماقدان عيبارتدير. يعني بو گون ايرانين داخيلينده موشخخص اولاراق 12 و عومومييتله 13 ويلايتده ياشايان آذربايجان تورکلريني بير بوتون اولاراق آنلاماق و بو جوغرافيياني بير سياسي چاتي آلتيندا بيرلشديرمک بيزيم اسا هدفيميزدير. گونئي آذربايجان ميللي حرکتي نين اساس هدفي بودور و باشقا شئي دئييلدير. بو اوزدن ده نئجه کي، بير آليش-ساتيش آنلاشماسيندان حوقوقي اثرلرين اوره تيميني بکله مک مومکون دئييلدير، عئيني شکيلده ده گونئي آذربايجان ميللي حرکتيندن ده بوتون تورک دونياسيني بيرلشديرمک کيمي بير هدفي گؤزله مک حوقوقن مومکون و دوغرو دئييلدير. البتته بورادا تورک دونياسيندان مقصديم جوغرافي مکاندان عيبارتدير. بو سببدن ده بو حرکتي شيمالي آذربايجانا باغلاماق و يا اؤزلري نين اورتايا آتديقلاري پان آذريزمه باغلاماق کيمي ايديعالار کؤکوندن يانليش و غئيري رئالدير. بيزيم حرکتي بو شکيلده تحيل ائدنلرين نييتلري باشقادير. البتته کي، بو، آرازين او تاييندا ياشايان ميللتيميزله و يا تورک جوغرافييالاريندا ياشايان سويوموزلا فرقلي کيمليک داشيديغيميز آنلامينا گلمز.   

  آليش-وئريش و ايجاره موقاويله لري آراسيندا آنلاشما آديندا اورتاق بير يؤن مؤوجوددور. هر ايکيسي ده موقاويله لرين اوصوللارينا و حوقوقي پرينسيپلرينه تابعدير. گونئي آذربايجان ميللي حرکتي بو حرکتي موتتهيم ائدنلره و اونو اؤز فلسفي ماهييتيندن اوزاقلاشديريب "ايران تورکلري" و يا "ايکي آذربايجانين سياسي و جوغرافي بيرلشمه سي" آدي ايله تبليغ ائدنلره قارشي جيدي بير جاواب وئرميشدير. بو قيسيم اينسانلار گونئي آذربايجانين و ايرانين اينديکي دورمونو آنلامادان حؤکم وئرمک زوروندا قالميشلار کيمي گؤرونمکده ديرلر. بونلارين بير قيسمي گئرچکدن درين بير وطن سئوگيسي ايله بو دوشونجه يه قاتيلميشلار و ديگر بير قيسمي ايسه حرکتي اؤز محوريندن چيخارماق آماجي ايله ايمکانيميزدان داها آرتيق اولانلارلا اوغراشماق ايسته ميشلر. بو حرکتي بير ايدئولوژيک زمينه اوتورتماق ايسته ينلر او اوزدن مووففق اولا بيلميرلر کي، ميللي حرکتين ايدئولوژيک يانليشليقلار حاققيندا تجروبه سي و بيلگيسي واردير. ديگر طرفدن، ميللي حرکتين موخاليفلري بو حرکتين ماهييتي ايله تاريخي بير دوشمنليک دويغوسو داشيديقلاري اوچون هر آدديمدا اونون ماهييتيني تحريف ائتمه يه چاليشيرلار. آنجاق بوتون چاليشمالارينا باخماياراق هر دفعه  ده مغلوبييتله قارشيلاشيرلار. بونلارين مغلوبييتلري نين سببي اودور کي، ايکي هم جينس اولمايان ماددني بير- بيرينه جالاشديرماق ايسته ييرلر. مثلن هم جينس اولمايان آلما آغاجي ايله چينار آغاجيني بير- بيرينه جالاق ائتمه نين نتيجه سي اولا بيلمز. فارس و تورک اولقوسو دا آيري-آيري جينسلردن عيبارتدير و جالاشديريلمالاري مومکون دئييلدير. بورادا يالنيز بير منطيقي يول وار، او دا بودور کي، هر بير ماهييتي تانيييب و اونلارا سايقي گؤسترمک لازيمدير. بو حرکت، مثلن عراقدا و يا ديگر قونشو اؤلکه لرده اؤرنکلرينه راستلانديغيميز کيمي قبيله لره دايانان بير حرکتليليک دئييلدير. چونکو بو حرکتين هدفي هانسيسا بير قبيله نين ايقتيصادي، سياسي منافعلري يولوندا دئييل، تام ترسينه، آذربايجان آديندا تاريخي بير جوغرافييادا ياشايان ميللتين تاريخي، سياسي و ايقتيصادي ستاتوسونو موعينلشديرمکدن عيبارتدير. بو اوزدن ده "قؤوملر"، "کيچيک کولتورلر"، " بؤلگه سل"، "محللي" کيمي تحقير ائديجي سؤزلردن يارارلانيب بو حرکتي دگرلنديرمک اونون ذاتييتينه، فلسفه سينه و هدفلرينه ترس گلمکده دير. بو حرکت چاغداش بير ميللت اولما يولوندا مرکزلشميش آذربايجان تورکلوگونون ميللي ائنئرژيسيدير.   

  گونئي آذربايجان ميللي حرکتي نين بو اؤزلليگي، اونو فئمينيست، ياشيللار، صينفي کيمي ايجتيماعي حرکتلردن فرقلنديرمکده دير. البتته بو، بيزيم حرکتيميزين بو کيمي ايستکلرله موخاليف اولماسي آنلاميندا دئييلدير. تام ترسينه اولاراق ميللي حرکت آديني چکديگيميز ايجتيماعي حرکتلرله تئوريک و فيکري باغلامدا ايرتيباط قورماق زوروندادير. يعني ميللي حرکت مدني زمينده ايستر-ايسته مز بو جريانلارلا ايليشکي قوراجاقدير، لاکين بيزيم فرقلي سياسي آماجلاريميز واردير. بو اوزدن ده ميللي حرکتي يالنيزجا مدني بير دئوينگنليک (حرکتليليک) اولاراق تحليل ائدنلر خطا ائتمکده ديرلر. بعضي مدني حاقلارلا باغلي ميللي حرکتين تاريخي تجروبه لري مؤوجوددور. مثلن پيشه وري حؤکومتي زامانيندا ايلک دفعه  اولاراق قادينلارا بوتون چاغداش مدني حاقلار تانينميشدير. ائلجه ده م. ه. رسولزاده نين باشچيليغي ايله قورولان ميللي دؤولتده قادينلارا، زحمتکئشلره هر نؤوع مدني حوقوق تانينميشدير. ميللي حرکتين بو يؤنو آسميلاسسيونا قارشي عکس آسيميلاسسيون داورانيشيني اورتايا قويور و اونو بير قبيله مرکزلي حرکت اولماقدان چيخارير. حرکتين بو يؤنو فارس شووينيزيمينين دين مرکزلي ناسيوناليزم آنلاييشينا قارشيدير. ميللي حرکتين دين مرکزلي دئييل، اينسان عاغليني و اينسان حاقلارينيي مرکز اولاراق گؤرمه سي بؤحرانا غرق اولموش اورتادا دوغودا باريش سورجينه قاتقيدا بولونا بيلر. ميللي حرکتين مدني يؤنو اونون ميلليليگيني بوتونلشديرير. بئله ليکله ده حرکت شووينيزمين حيله لرينه یاخالانماقدان قورتولموش اولور. بو دا اؤز نؤوبه سينده سبب اولور کي، ميللتين دويارليليغي حسابينا 1946-جي وطنه ميزده اولدوغو کيمي بير قتل عاآملا راستلانماياق و يا بالکانلارداکي اولايلار يوردوموزدا تکرارلانماسين. البتته کي، بو او دئمک دئييلدير کي، شيددتدن چکينمک و شيددت اورتايا چيخديغيندا حرکتي ترک ائتمک لازيمدير. بو، حرکتين گئنيش حوقوقي، علمي و فلسفي طرفلريني آنلاماق دئمکدير.  ميللي حرکتين بو يؤنو اينسان حاقلاري، دئموکراسي و مودئرنيزمله سيخجا ايليشکي ايچينده دير. ميللي حرکت مدني ميللتلرين قبول ائديب و دستکله ديکلري دگرلرله تام بير اويوملولوق ايچينده دير. ميللي حرکتين تاسيسچيلري دونيانين مودئرن دگرلري ايله فيکري باغلامدا ايرتيباطدا اولموش و بو دگرلردن تاثيرلنميشلر. بو اوزدن ده ميللي حرکت اؤز ايستکلريني اؤنجه مؤوجود ايران آناياساسي نين 9-15-19-20-49-جو مادده لرينه داياناراق سيويل يوللا الده ائتمه يه چاليشدي. سونرا ايسه ميللي حرکت اؤز تکامولو ايستيقامتينده اولوسلاراراسي تشکيلاتلارين مرامنامه لرينه آرخالاندي. اينسان حاقلاري بياننامه لري اساسيندا ميللي ايستکلر اورتايا قويولدو. اؤز ايستکلرينده ايصرارلي اولان ميللي حرکت بؤلگه ده اينسان حاقلاري نين گئرچکلشمه سي اوچون اولوسلاراراسي تشکيلاتلارين دا قارشيسينا اينساني بير اؤده و قويدو. بو بؤحرانلي منطقه ده اولوسلاراراسي اينسان حاقلاري تشکيلاتلاري سؤز قونوسو بؤحرانلاري حلل ائتمک ايسترکن گونئي آذربايجان ميللي حرکتي نين ايستکلري ايله ده ماراقلانماق و حسابلاشماق مجبورييتينده قالميشلار، قالاجاقلار. گلن يازيلاريمدا گونئي آذربايجان ميللي حرکتي نين اينسان حاقلاري فلسفه سي ايله ايرتيباطي حاقيندا دانيشاجاغام

Farscadan çevirdi: Güntay